PUKEN MOE HENA

Inak senaren….

Onek sama peteno ko’on moe

Tobo rae lango losen lolon

Peten moe rae ruran puken

Hedono moon ape nuhun ti ma’an kame mekan watan kena’en

Pi reron ni uran beto liko kuma, pae bani

kedoko dela onek nai peteno. Nolhon kae, go  leik keni-keni pana gawak woka pai tuda pia Gelong Lama Luat, Luat Lama Ledan.

onek peten budi dike moenem, neik kewatek kiwane ka’an towe  nawakek ti onek nabe mu’ut. Neku ina moe mai tobo ruran puken, gute wato ma’an gae wata.   
Nuan padu rema gere…..mo ole goe lau uma sika tukan. Mo tutu temutu “kelake ado pehan-kewae sedo boleng,” pai  hipuka mo tutu tapan  opu kopong, na huban bolaka no’on suri sanga rian.

Go  tobo doan pia tanah sina Jawa. Kai siga sainek pia tanah sina Jawa,  Kai seba saphekem lau Ngangoyakarta. Inak senaren…..Pole dike ti go ake kaan gelupak  kawatek  ina tane. Ake kaan gelupak wata kenaen, noon gong bawa alan golo-golo naan mayan pata hedung gerek.  

Ina moe onem bahe-bahe hulen te’de anam moenem pia tepin tanah sina. Mai hukut koda, amet kirin ti maan hain beliwo lodan. Go mete peten tumutu, noon pehen mege koda kirin moem: “pana peten lewo tanah. Jaga leim limam noon nuhum wewam.” Kirin moenem bereka tua ina, kaan pate heluro di bisa hala.

Koda aya-aya ni kaan gatiro koda koke lali sina. Kirin rai-rain ni ka’an gatiro kiri bale milin jawa.  Med’o di ake ma’an ure tuen, mel’an di ake ma’an pelewan gole.***(Valery Kopong-Tangerang)