Kemimi Bala Tawan

Ama belen  ata diberu’in, kolen mugu matan. Puken nalan milan ata diken ti mo Mo soron Yesus, ana eh’an uhurem tukan, lodo liko nuba pae nara baran.  An’am Yesus nai oron sorako pia lewo pulo hikun lema ti Naran Moenem de belolo hiko ekan. Pure pai, an’am hode kirin  apin padu, naan hide kame mara labot.  

Puken koda te pelate, kirin de gike, ti mo huda an’am koli lolon lepa, huban bolaka noon suri sanga rian, na’an hiba kame.   Ata ra’an nani lou loran, mete hulen an’am ba’an krus kayo bala ata nalan. Rai puin peliharo, gehan gamaro ti ra’aro helo ata diken hala.

Ama ata raya tanah ekan, mo molo mai gute puan bala sipa. Toboro teti lango taran bala, maan beledane wato, ti mete hulen tede an’am Yesus nai huak hawek koda kenenane weli man Getzemani on’e.    Koda moenem gike te pelate helo lia lali nedun tukan, neku soot na kedoko hala. Kirin moenem di berangin kuran, helo ape seru nepa, neku na nain geredap kuran.

Kaka rogan, kaka mamun Yesus sare. Huban bolak de bedela, mo mamun ata tanah kenahin. Gawe rusak nasib daten, lela warat seni tawan. Peten tudak lewo tukan, susah oleh le kelekat kai marin kala moe. Sudi taga tanah lolon, paya nudak le kenahin ti kai mipin kala noga. Tedo tai dore laran moem, laran doan  apa dike, laran bo kemimi bala tawan.  Ewa lela nuku sulu    laran moem, sampe ri’e salan sina putin.***(Valery Kopong)