“Ata loge kapek jawa, ina….tite loge kapek kiwane.”

Maken “Kapek jawa,”  noon maken kapek kiwane, ra tutu marin ata kwashan noon ata ribhun. Ata kwashan, ra loge towe ale mel’a amu. Se lagu Simon L. Muda ne ra gatiro kapek jawa, kewatek terhan. Kewatek terhan ne ata ribhun hope noi hala, puke marin doihaka take. Simon L. Muda lagu ne naan palen tite wahan kae. Palen ata Hinga-Lamabunga, palen lau tokan Witihama, palen ata Kolilanang Gaga, palen ata Loba Lama Lewa, Lewa Liwu raya. Pai hipuka palen tada tite wahan kae: rae tepin tanah tadon.

Wia reron, go buka-balok lemari goen pia tanah Jawa, go koi kaset nolhon. Kabe hule kaset, judul lagu noon penyanyi, pikiran goenek rae lewo. Judul lagu: Ina rae lewo, Lipat Lungun Lolon, Tadon Tanah Geto.  Raraan nyanyi noon kodhan, helo ata tobo koda. Koda noon makenen, kirin noon raine. Koda ra penyanyi raan ne, raan palen tite: ata kebelen noon ata rahyan (ata ribhun). Towe teti lolon sabok, pai tali kewatek terhan, neku ake maan pelewanek gole. Towe lali kaan kapek kiwanen, ake maan ure tuen. Tite ata koli lolon hena.***(Valery Kopong)