Friday, January 19, 2018

OPU DULI


OPU DULI

AMA  ATA LEWO NUDA, TANAH KENAHINEN. NUANE TOU PAI GETAN, MO IKIT LEIM PANA PAI, MO TOBO GATU PAI TUTU DORE LEWO KUATEN KEMUHA, LAU PUKEN ME’TE DAI. TUTU MA’ARO DIKE-DIKE SAMA ATA TUTU NUAN.
MUSIM RUA HAKA LABOT, MO IBA LIMAM WALEN GAWE, GAWE DAI MO PAE GERIAN, PAE MIPIN TED’O TANAH IK’E LE KEWAAT LAU WAKON ME’TE PAI, MIPIN MAARO SARE-SARE SAMA ATA SEMU MUSIM. PUKEN AMA ATA LEBA NUBA BUAT NARA, AMA ASALEM KERU BAKI, DAEN LEWO TANAH NA’EN.


Thursday, January 11, 2018

"MARIN KAAN KOI LO'O, TUTU KAAN DI KELEPO KURAN"


LEWO TO MO LODO PANA, OLA MAI MO GELEKAT ATA LEWO ATA TANAH, LAU SOLOR WATAN LEMA, PAI HIPUKA PIA LOBA LAMA LEWA, LEWA LIWU RAYA. OLA DORE MOON BELEN ATA PULO KAE MAAN SOGA LEWO NARANEN, LEWO GELONG LAMA LUAT.
TANAH NADON MO GAWE DORE. HERE MAI MO GEWAYAN ATA RIAN ATA WETAN. LAU EKAN LIWU RAYA. HERE TEDO MOON ROGAN ATA LEMA KAE, MAAN IKIT MAKEN RIAN WETAN, TANAH LUAT LAMA LEDAN.
OLA DORE SAMPE MAARO TUN PULO HAKA GETAN, MAAN RAYAHKO RO KEPALA. HERE TEDO SINGGAH MAAN WULAN LEMA HAKA NATAN, MAAN YOUKO RO PEGAWE. MAAN RAYAHKO RO KEPALA, GERE TOBORO WELI KEROSI MATAN PITO, TOBO TI GELIKI LEIM. PUKEN PATI MATAN AKU AMA, MAAN YOUKO RO PEGAWE, LODO PAE WELI KEDERA LIMAN LEMA, PAI TE GELIKI BADAN, TUA TURUN HELO ARE, AMA. ONEK MARIN LEWO NOLO MO DORE, LEWO MO HUNGEN TETI KOTEM, YONEK MIPIN, TANAH NOLO MO TEDO, TANAH MO DATA LALI JALEN. AMA, TETI TAURO KAE, KAI MARINO KABE AKU. LALI NABE NATEN NONIN, KAI MIPINO KALA NOGA, KAKA. Bahagia bersama anakmu, Sr. Renalda / Erna.

Friday, January 5, 2018

OPU PENATEN AMA



AMA ATA NATAN LEWO. AMA ATA DI BERUIN KOLEN MUGU MATAN.  AMA ATA BELEN LEWO, MO MOLO MAI GUTE PUAN BALA SIPA.  WELI HIKUN LIMAN WANAN, GERE GADAKO TETI DI KEWANAN WAKON.

KAWO RAE DUA BELE. HEKU NOLO NAI TOBAN KAYO. SAMPE NAAN TUBAK WATA, TI WATA GERE BASA RARUK. TALE LAU WATAN ROGAN, HEKU NOLO NAI TERI TALE, NAAN AD’A UTAN, TI UTAN GERE GOBU GABA, PUSUN TETI KEKO REO.

AMA ATA DIBERUIN KOLEN, MUGU MATAN. MO TUTUN SOLAN LOLON GOKA RAE HIKUN LIMAN WANAN. MO HADIN HADAK WUR’HAN WETOT TETI DIKEWANAN WAKON. KODA DIPESAKA AMA GENAN, MO TUTU DIKE WELI PITA SINA MATAN, MA’AN LIKO KAKAM PULO, LEWO TUKAN.
KIRIN DIBERAGI KAKA NATE, MO MIPIN SARE WELI DAN BUNO PUKEN, MAAN LAPAK  ARIM LEMA LUWO LOLON.
MO MULA KODA, KODA KERU NOON BAKI, SAMPE MAAN KERU BAKI TAWAN MUPU IA LEWO TANAH LODO.
MO ADA KIRIN, KIRIN WAI NOON SELAN, SINGGA MAAN WAI SELAN BA LEKAT, IA RIAN WETAN GERE. WAI SELAN BA LEKAT, TI SAMA NAEN LODO TIBA LALI TANAH, WAI NOON MAKOK TI’BA, TI GERE HULU TETI LERA, SELAN NOON BULI BUA. KAKAN DIKE ARIN SARE, SARE SAMPE NAWA. (Kopong ata leko gayuk)

OPU DULI

OPU DULI AMA   ATA LEWO NUDA, TANAH KENAHINEN. NUANE TOU PAI GETAN, MO IKIT LEIM PANA PAI, MO TOBO GATU PAI TUTU DORE LEWO KUATEN ...